عـن الانترفيو

 قبل كده أنا كنت بقدم ال CV بتاعي بس. متحطيتش في الناحية التانية. الناحية اللي بيتقدم لها ال CV . فعرفت وجهة النظر التانية اللي بتبص على ال CV بتاعي. وعايشت كلام كنت بقرأه بس، زي كتابات محمود مجدي مثلا. والمعايشة غير القراءة خالص.

أنا وانت وغيرنا كتير بنرمي ال CV في أي حتة وخلاص. مش بنشغل بالنا هيتم التعامل معاه ازاي. عملت إعلان عن طلب حد خبرة في الآتي:
Microsoft
VMWare
Symantec 
Veeam
وشوية حاجات تانية

المهم، عدد المتقدمين في الأسبوع الأول كان 70 . طبعا مطلوب مني أفر ال 70 CV . ومنهم CVs ما شاء الله سبع صفحات و14 صفحة. ده السي في لوحده بدون المرفقات التانية اللي ملهاش لزمة. الفلترة دي بتكون مجهدة. لأني لازم أعدي على كل CV وأبدأ في استبعاد الناس وعمل Shortlist مبدئية.

المرحلة دي اللي بيكسب فيها ال CV اللي مكتوب بشكل مختصر وفي المضمون علطول. ال CV اللي عارض مهارات صاحبه وتكون المهارات دي مناسبة للوظيفة المطلوبة. خلي مهاراتك دي في أول ال CV . لأن اللي بيقرا ال CV بتاعك بيتناقص تركيزة مع كل صفحة بيعدي عليهاز غلط جدا تكون مهاراتك اللي الراجل ده بيدور عليها موجودة في آخر صفحة. اعمل حسابك ان اللي هيفلتر ال CV ممكن ميكونش راجل تكنكال اصلا ولا يعرف المصطلحات دي بتاعت ايه. هو بيدور على شوية Keywords معينة وخلاص. ال CV هو ال Tool اللي هتوصلك انك تعمل الانترفيو. اتعامل معاه على هذا الأساس واهتم.

فيه بعض الحاجات في ال CV ممكن تتسبب إن بدل ما يتعمله دونلود من الميل يتعمله Delete ، منها:

حضرتك كاتب إنك خبرة في ال DOS
حضرتك كاتب إن خبرة في Win 9x, ME, 2000
حضرتك كاتبلي اسم الدكتور أو الدكتورة اللي أشرفت على مشروع تخرجك
حضرتك كاتب إنك أخدت كورس عند المهندس فلان
حضرتك مقدم لشغل IT ومسجل كورسات الفوتوشوب والاوتوكاد وال Developing اللي انت أخدتها
ال ICDL فيه سم قاتل
مجموعة من ال Docs اللي ملهاش اي لزمة ومع ذلك باعتها، مثلا: شهادة الجيش ، شهادة الميلاد ، شهادة التخرج، شهادات خبرة، صورة البطاقة، صورة الباسبور، صورتك بالحجم الطبيعي ، صورة من المقالات اللي الجرايد كتبت عنك فيها. (أه والله جتلي كل الحاجات دي )

نيجي لبعد كده ، خلاص عديت المرحلة الأولى من الفلترة ، وجت مكالمة التليفون. خليك بروفشنال ، بلاش تناكة ، لو المعاد مش مناسبك اطلب معاد تاني. لو مش هتعرف تاخد أجازة من شغلك اطلب معاد بعد ال Working Hours . بلاش تسأل عن الفلوس. الفلوس دي خليها آخر حاجة. لما أول كلامك يبقى فلوس يبقى انت مش بتاع شغل. ده الانطباع اللي بتنقله فورا.

اتحدد معاد الانترفيو ، روح في معادك. بلاش تتأخر. لو اضطريت تتأخر اتصل. لو مش رايح خالص اتصل اعتذر. أكيد اللي منتظرك موقف كل حاجة في الوقت ده علشانك. فلو مش هتروح عرفه من قبلها علشان متضيعش وقته.

في الانترفيو ، بلاش فتي. عارف جاوب مش عارف قول معرفش. هتكسب احترام اللي قدامك. انت لو فتيت قدامه بتنقله انطباع انك هتفتي عن الكستمر. والفتي عند الكستمرز بيسبب تسلخات. محدش هيقبل حد فتاي.

هيبان في الانترفيو انت كدبت في ال CV ولا لأ. ال CV فيه مهارات كويسة جدا. لكن تيجي تسأل فيها يقولك لأ ده كورس شوفته فيديو بتاع المهندس فلان. لأ دي أنا معملتهاش بس كان المهندس علان نزله شرح وأنا شوفت فيه حلقتين. طب ده كلام؟

بعد الانترفيو لاحظت إن كل الناس عايزة النتيجة قبل ما تخرج. كله بيسأل عن ايه الأخبار. عجبتك ولا لأ. يجي مني ولا مش هنفع...... بلاش السؤال ده. ممكن واحد يرد عليك بنصيحة وواحد يصدمك. وممكن تكون مقبول لكن علشان السؤال ده تترفض. لأنك ضمنيا بعت رسالة إنك مش واثق في نفسك. فخلي بالك.

ال Recruitment Process بتاخد وقت طويل شوية. يمكن شهور. فبلاش تكون لحوح في الأسئلة وخليك صبور. لو مقتنعين بيك مش هيسيبوك. ولو مش مقتنعين، كتر الأسئلة مش هيخليهم يقتنعوا.

خلص الحوار كله ومتقبلتش ، وايه المشكلة. ملكش نصيب فيها.

دايما اسأل نفسك سؤالين:
إيه يخليني اتقبل
وإيه اللي خلاهم يرفضوني

السؤال الأولاني إجابته حاجات لازم تعملها وانا اتكلمت عن بعض منها فوق.

السؤال التاني هو اللي مينفعش تعمله في أي مرحلة من المراحل اللي فاتت علشان متترفضش.

مش دايما هتترفض لأسباب فنية.

ممكن تترفض علشان لغتك مش مناسبة. ومش مطلوب تبقى Native speaker طول الوقت. لكن دايما فيه Level من اللغة مطلوب في المكان اللي انت بتقدم له. لو انت مش على قد ال Level ده في الغالب هتترفض.

زي ما ممكن تترفض علشان ال Technicality بتاعتك أقل من المطلوب ، ممكن تترفض علشان ال Technicality بتاعتك أعلى من المطلوب. لو مطلوب Junior مينفعش أحط مكانه واحد Senior.

هتترفض لو كدبت في ال CV .

ممكن تترفض لأسباب تانية غير كده، على سبيل المثال، بعض شركات ال IT Solutions بترفض تاخد حد من عند ال Customers بتوعها. يعني ممكن تكون مناسب جدا لكن مشكلتك إنك جي من عند كستمر.

ممكن تترفض علشان ساكن بعيد فهيكون التزامك فيه مشاكل ولو التزمت هتكون جي مستهلك من المواصلات وتعب الطريق. علشان كده بعض الشركات بتشترط في الإعلان إن المتقدم يكون من منطقة معينة.

ممكن تترفض علشان انت مبالغ في تقدير نفسك. مثلا لما اللي بيعملك الانترفيو يسألك تدي نفسك كام من عشرة في التكنولوجي دي. تقوله 9 من عشرة. وبعد ما يسألك فيها يديك 1 أو 2 من عشرة. خلي بالك إن هو نفسه ممكن يكون إمكاناته في نفس التكنولوجي 5 من عشرة. في الحالة دي هيبقى انطباعه عنك ايه؟ يعني أبو 5 من عشرة لما اختبرك طلعت 2 . أومال بتقول على نفسك 9 ازاي؟؟؟ كده يبقى انت عندك نظرة سطحية عن التكنولوجي دي. دي الرسالة اللي بتتنقل.

ممكن تكون كويس لكن مش قادر تبين إنك كويس. وبالتالي بردو هتترفض.

ممكن تبقى بالنسبة لي كويس جدا. لكني مش الوحيد صاحب القرار. ولازم أنقلك للي بعدي. بس لو أنا عارف اللي يعدي بيدور على إيه ، وعارف ان اللي بيدور عليه مش موجود فيك هختصر وأرفضك أنا.

في النهاية لو ده نصيبك محدش هيقدر يبعده عنك. ولو مش نصيبك مش هتنوله.