كيف تقرر مالذى يجب أن تفعله بحياتك؟

بعد ما بنتخرج من الثانوى أو الجامعة حتى أما بنكبر بعد كدا .. بنبدأ نلاقى نفسنا ساعات قدام اختيارات مصيرية شوية و بيبقا لازم اننا ناخد قرار و بنفضل نسأل نفسنا .. " هل هحب المجال دا ؟ " " هل هقدر أنجح فيه ؟ " " هل هبقا سعيد و أنا شغال فى الوظيفة دى بعد كدا ولا لا ؟ " .. أسئلة كتيرة ساعات بتبقا مصدر الدوشة الأول فى الفترة دى.

بس لما نيجى نبص لسير العظماء و الناس اللى غيرت فى مجالاتها .. فهنلاقى ان مفيش سن معين هما مشتركين فيه فى بدايتهم .. مش مهم أصلاً هنبدأ امتا .. المهم اننا نوصل للى احنا عاوزينه فى الآخر واللى يخلينا نحس اننا عملنا حاجة قدام نفسنا قبل ميكون قدام الناس كمان .
و هييجى هنا سؤال يطرح نفسه بقوة ..

(كيف تقرر مالذى يجب أن تفعله بحياتك؟)

والإجابة على السؤال دا هتختلف من شخص لآخر، بس فى شوية حاجات لازم نكون مدركينها قبل منجاوب ..

1- مفيش حد عارف المستقبل
معظمنا و احنا صغيرين بنبقا حاطين خطط كدا لمستقبلنا .. عاوز ابقا مهندس أو دكتور أو طيار و حاجات من دى كتير .. بس فى معظم الأحيان مش بيحصل اللى احنا مخططين ليه بالظبط .. البنت اللى انت كنت عاوز تخطبها ممكن تطير .. و الشركة اللى كنت بتحلم تشتغل فيها ممكن تفلس و تتباع فى لحظة و ممكن مجموع الثانوية العامة يمنعك من الكلية اللى عشت تحلم بيها.

انت نفسك ممكن تتغير و تحس ان اهدافك دى كانت طفولية شوية .. فاحنا مش عارفين بكرة مخبى ايه
فـ متحطش تركيزك كله على المستقبل .. فكر شوية فى الحاضر اللى انت عايشه و حاول تعمل كل اللى تقدر عليه عشان متندمش انك ضيعته بعدين ..

2- حاول تتكيف مع التعب و الجهد
من الحاجات اللى لازم كلنا نهتم بيها و نطورها هى اننا ازاى نتعب و نتحمل الصعب و كل دا عشان نوصل .. لو متعودتش على الشغل الصعب هتفضل مكانك على طول ..
و زى مقالوا " ومن يتهيب صعود الجبال .. يعش أبد الدهر بين الحفر " .. طلع نفسك برا الصندوق المغلق بتاع تتخرج و تشتغل و تتجوز و تتخلف و تموت انسان عادى معملش أى حاجة فى حياته لأنه ببساطه محاولش يتعب عشان يوصل لأى هدف .

3- خليك دايماً مستعد لأى فرصة
ممكن تبقا مش لسه موصلتش للحاجة اللى انت بتحبها فعلاً و نفسك تقضى بقيت عمرك بتعملها .. بس لو انت اهتميت بقدراتك و امكانياتك هتبقا مستعد لأى فرصة ممكن تجيلك.

اعرف أكتر عن دماغك شغالة ازاى و حاول تكون سمعة كويسة و تخلى الناس تثق فيك و متخليش أى حاجة تشتتك عن طريقك .. و خليك فاكر ان كل حاجة ليها وقتها فمتندمش على أى خطوة انت مشيتها فى حياتك .. و حط نقطة و ابدأ من جديد.

مستنى مين يغيرك